William Gibson Sloan – ein valdi at fara – veking í Føroyum

09/12/2021

Bókin lýsir persónin William Gibson Sloan og sermerktar partar av ævisøgu hansara. Hon er sett saman av einum úrvali av týðandi søgubrotum úr slóðbrótandi lívi og virksemi Sloans, sum kann geva mongum íblástur í dagliga lívinum. Men henda sjáldsama lívssøga kunnar eisini allar føroyingar um ein sermerktan persón, sum setti  djúp spor í føroyska samfelagnum og føroyskari trúarsøgu.

Gamli Sloan, sum hann varð nevndur, var lýðin missiónsboðum Kristusar. Hann kom úr Skotlandi til Føroya í 1865 við gleðiboðskapi, sum broytti og menti eina heila tjóð.

Ein, sum ferðaðist saman við Sloan eitt skifti í 1899, greiðir soleiðis frá:

Sloan dugdi væl við fólki, og sum oftast tóku tey væl ímóti honum. Eftir møtið stukku vit inn á gólvið hjá fólki, hann heilsaði teimum, eisini børnunum, spurdi  konuna, hvørjum skipi maðurin var við, og hvussu gekst við fiskiskapinum. Hann troystaði eina mammu, ið hevði mist eitt barn, og eggjaði einum gomlum manni at søkja Harran. Hann uggaði eina blinda konu við vónini um himmalin og legði børnunum eina við at vera góð hvørt við annað.

Heri Jacobsen, lærari í týskum og søgu, hevur týtt bókina til føroyskt fyri forlagið Leirkerið. Týskarin Klaus Güntzschel skrivaði upprunahandritið. Hann var hugtikin av lívssøgu Sloans og avgjørdi, at týskarar eisini skuldi fáa høvi at kunna seg um hesa  hugvekjandi trúarhetju. Klaus kom við fotografinum Lucian til Føroya at taka myndir, sum kundu gera søguna um Sloan meir livandi. Bókin hevur tí hópin av gomlum og nýggjum myndum, sum lýsa føroyska samfelagið á døgum Sloans og í dag.
 
Greitt verður frá, hvør maðurin var, sum 24 ára gamal í 1863 millum annað bað hesar bønir:

Harri hjálp mær
- at arbeiða hvønn dag miðvíst og skipað í øllum mínum verki.
- at fara tíðliga upp.
- at vera tolin og áhaldin í truplum umstøðum og í mistøkum.
- at alt tað, eg hugsi, sigi og geri, má vera við næstrakærleika.
Áh Harri! hjálp mær í Jesu navni at fremja hetta, Amen.

Bókin er 120 síður, kostar kr. 195, og er at fáa í øllum bókhandlum kring landið. Hon kann eisini keypast á heimasíðuni hjá Leirkerinum www.leirkerid.fo

 
Forlagið Leirkerið


26/03/2022

Nýggjar barnabøkur

Arni Zachariassen skrivar: Eg haldi, tað er týdningarmikið at týða. Tí havi eg týtt hesar báðar, sum koma út í dag „Undrið klok…

09/12/2021

William Gibson Sloan – ein valdi at fara – veking í Føroyum

Bókin lýsir persónin William Gibson Sloan og sermerktar partar av ævisøgu hansara. Hon er sett saman av einum úrvali av týðandi sø…

01/09/2021

SØGUBÍBLIAN UM JESUS

HVØR EINASTA SØGA TESKAR HANSARA NAVN Forlagið Leirkerið hevur júst givið eina nýggja barnabíbliu út við heitinum „Søgubíblian u…

VÍS FLEIRI TÍÐINDI