Í hesi bókini, „Aðru ferð“, gevur Victor Danielsen eina livandi mynd av, hvussu tann stórhending i mannasøguni, tá ið Kristus kemur aftur, kann hugsast at fara fram i eini føroyskari bygd.
 
Skald, sum Victor Danielsen var, dugdi hann sera væl at endurgeva hitt vanliga gerandislivið á slíkan hátt, at tað — samantvinnað við ta skelkandi hending, tá ið Harrin Jesus kemur aftur, og summi fólk hvørva og onnur verða eftir - festir seg í sinnið, langt eftir at bókin er lisin og elvir tonkunum at leita longri enn til matin og klæðini og stríðið í dag — fram at hinum týdningarmesta i hesum livi: At vera til reiðar!
 
Victor skrivaði tvær skaldsøgur, hesa og „Nei, lyftið sveik ikki“. „Aðru ferð“ er hin betur kenda. Men mangir føroyingar munnu ikki vita, at „Nei, lyftið sveik ikki“, er framhald av „Aðru ferð“ og lýsir somu stórhending frá eini aðrari - ikki minni spennandi og týdningarmiklari síðu.