Hjørdis og Petur Háberg eru tvey væl kend nøvn í Havn og kring alt landið. So leingi, sum Petur livdi, vóru tey ein vøkur býarmynd, ið ofta var at síggja á Havnargøtum.

Petur legði stórt bókmentaligt avrik eftir seg, dyggiliga stuðlaður av Hjørdis, serstakliga tey seinastu árini, tá ið heilsa hansara var farin at bila.

Petur doyði í 1984, men síðani tá hevur Hjørdis ikki ligið á tí løtu síðuni. Hin hevur savnað handrit, myndir og tilfar hjá Peturi við tí fyri eyga at geva tað út og hevur eisini sjálv skriva hesa bókina.

Her skrivar Hjørdis um tilburðir úr sínum egna lívi frá smágentu og til í dag. Av stórum áhuga er at fylgja henni á gonguferð hennara gjøgnum Havnina í 1920-unum við myndum á nærum hvørjari blaðsíðu og við frágreiðingum hennara, soleiðis sum hon minnist høvuðsstaðin, tá ið hon var ung.