Marius Absalonsen skrivar soleiðis í fororðinum:

Eg havi ein vissan áhuga fyri at festa á blað nakrar frásagnir um vandaferðir á sjónum, har alt spurdist upp í góðum.

Vit eiga so mangar frágreiðingar um skaðatilburðir á sjónum, men mær tykir, at ov lítið er skrivað um ferðir, har alt endaði væl. Hesir, sum eg havi hitt sum frásøgumenn, hava allir givið Gudi æruna, og tað er ikki minst tí, eg seti meg niður at skriva.

Hesar frásagnir eru í fleiri førum munnligar, sum mugu takast við tí fyrivarni, at einkult smærri mistøk kunnu koma fyri, sjálvt um hendingarnar eru veruleiki og frásagnirnar eftir bestu sannføring.